كشف الإعلامى أحمد شوبير حارس مرمى الأهلى ومنتخب مصر السابق، القصة الكاملة وراء أزمة إمام عاشور لاعب وسط الفريق، مع المدير الفنى مارسيل كولر قبل مباراة صن داونز.
واستبعد كولر، عاشور من قائمة الأهلى فى مباراة صن داونز، وبعدها كشف الأحمر فى بيان رسمى أن اللاعب يعانى من إصابة برشح والتهابات فى الكاحل.
وقال أحمد شوبير فى تصريحات إذاعية اليوم الأحد: «باختصار كده هقول لكم كل قصة إمام عاشور ومشكلته فى الأهلي، هو إمام مكانش عايز يسافر تنزانيا فى مباراة الذهاب مع سيمبا عشان خايف من تجدد الإصابة، لكن مستر كولر قال له تعالى وأنت كويس والدكتور مطمنى عليك، فإمام عاشور فكر إنه هيلعب هناك قدام سيمبا لكن كولر محطوش فى التشكيلة الأساسية ولا نزل احتياطى وده ضايق إمام».
وتابع شوبير: «لما رجع الأهلى مصر إمام عاشور لم يتدرب بجدية (خستع) فى التمرين وادلع شوية وكولر معجبوش، وقال لمستر كولر هشوف الدكتور يشوفنى والقصة والحدوتة، فجت مباراة العودة مع سيمبا فكولر لم يضعه فى التشكيلة وخلال المباراة معملش تغييرات باستثناء موديست فى نهاية المباراة بناء على طلب كهربا فزعل إمام عاشور أكثر إنه لم يشارك».
وأضاف شوبير: «من هنا كان قرار كولر إنه إمام عاشور ما يسافرش وطبعا فى الأهلى قالوا إن فيه تقرير طبى وأنا همشى وراه التقرير الطبى وهقول إنه مصاب».
واختتم شوبير: «عموما أتمنى الموضوع ده ينتهى وإمام لاعب تمتع بحب الجمهور بعد ما كان الجمهور زعلان منه، فمش من السهولة تستبعد لاعب زى ده وما ينفعش برضه لاعب زى ده يخرج من الإطار العام للنادى الأهلى ونظامه دى قصة إمام عاشور عشان تبقى واضحة للجميع».