عقب الإعلامي أحمد شوبير، على التصريحات التي أدلى بها حارس المرمى السابق نادر السيد، بعد مباراة القمة الأخيرة.
وفاز الأهلي 5-3 على الزمالك، في قمة الكرة المصرية، ليواصل صدارته للدوري المحلي.
وقال نادر السيد حارس الزمالك والأهلي الأسبق: “الأهلي لم يكتسح مباراة القمة.. لو خرجنا ضربات الجزاء النتيجة ممكن تعادل ٢/١ بالعافية.. بصراحة شايف ادارة كارتيرون افضل من ادارة موسيماني”.
وعقب شوبير عبر برنامجه على إذاعة أون سبورت: “٥/٣ في نتايج القمة نتيجة تقيلة نتيجة كبيرة اول حد تحييه المدرب طبعا”.
وواصل”الناس بتلوم كارتيرون على انه لعب غلط واتقفل على مفاتيح اللعب لازم نتكلم بما يرضي الله، انا بس هاعكسها خلينا نقول الزمالك اللي كسب الأهلي ٥/٣ وان المباراة مشيت بنفس الطريقة كان حصل ايه؟ ياه عالعظمة وياه عالجمال ويا على كارتيرون ويا على اللعب المفتوح ويا على الهجوم ويا ويا ويا”.
وأضاف: “قلت من بعد فوز الاهلي ٦/١ على بطل النيجر والهجوم على موسيماني فيه حد شغال في سكة الهجوم على موسيماني بالهجوم الضاري”.
وتابع: “ماينفعش ابقى كسبان ستة حتى لو فريق صغير واتهاجم بالشكل ده، وابقى كسبان منافس عنيد زي الزمالك ٥/٣ وتبقى الدنيا رجوع الزمالك”.
وأردف: “رجوع الزمالك على عيني وراسي بس الأهلي كسبان خمسة، ايه يا جماعة في ايه؟”.
وأضاف: “اللي يجننك بعض الزملاء القدامى يقولولك ايه، اصل احنا لو شيلنا ضربات الجزاء تبقى الاهلي كسب ٢/١ بصعوبة، لا بجد كنت فاكرك بتهزر لا بيتكلم بجد هو ده ممكن يطلع من لعيبة كورة”.
وختم: “لعيب كورة يقول نشيل ضربات جزاء يا ليلة مش فايتة حتى الناس قالوا امنع الضحك، وقال ان كارتيرون صحح الوضع، صحح الوضع ازاي يا ابو الكباتن ده الماتش خلص ٥/٣، فيه اوقات لما تقول الواقع بيبقى جميل”.
