عبد الحفيظ: رئيس الفيفا كان في مصر علشان يلعب مباراة خماسية فقط؟ هناك عدم احترام وتقدير

تحدث سيد عبد الحفيظ مدير الكرة بالنادي الأهلي عن أزمة موعد بطولة كأس العالم للأندية وتعارضه مع بطولة أمم إفريقيا.
وقال عبد الحفيظ في تصريحات لبرنامج الماتش الذي يقدمه الإعلامي هاني حتحوت عبر شاشة صدى البلد “الموقف دخل في حتة احترامية وتقديرية، مستحيل تلاقي أمم آسيا أو أوروبا أو اي قارة بتتعارض مع بطولة للفيفا”.
وتابع “بكرة هنبعت جواب للاتحاد الدولي والافريقي والمصري، رئيس الاتحاد الدولي كان موجود في مصر من يومين لعبنا خماسي وخلاص بس؟ مفيش حد اتكلم في حاجة عن الموضوع ده مثلا ؟”.
وأضاف “ماذا لو كان في تعنت من الاتحاد الدولي وصمم على المعاد؟، احنا مسموح لينا بـ 23 لاعب بس في اللائحة بتاعة البطولة، لو عندي 8 ولا 9 مع منتخب مصر ومعلول مثلا مع تونس وديانج مع مالي، هدخل البطولة بكام لاعب”.
وواصل “اتحاد الكرة سمح من اسبوع لبيراميدز والمصري باستبعاد لاعبيهم من قائمة كأس العرب، هل هتتناقش معايا في ده ولا لا؟”.
وأردف عبد الحفيظ “لازم يكون في قعدة، مش هستبق الاحداث لازم يكون في قعدة ويتجاب ورقة وقلم، فرقة بتدخل بطولة بـ 23 لاعب ونادي واحد معندوش 11 لاعب اساسي، المباراة الأولى هي الأساس وتوديك لمراكز متقدمة أو خامس وسادس بقى”.