لليوم الثالث على التوالي يتصدر مرتضى منصور رئيس نادي الزمالك المعزول، الهاشتاجات الأكثر تداولا علي تويتر مصر.
وكان مرتضى منصور نشر مقطع فيديو عبر حساباته على مواقع التواصل الاجتماعي تحدث فيها عن موقفه من إمام عاشور.
وقال منصور في الفيديو: “محمد حافظ والد زوجة إمام عاشور هو كوافير الأسرة عندي وكوافير معظم الفنانات، كلمني وقالي هاجبلك إمام و نقعد نتكلم قولتله ماشي، بعد كده لاقيته بيتصل بيقول إن إمام جالي البيت و سابلي مراته و قالي لو عايز تاخدها خدها، وماتدخلش في قصة الزمالك”.
وتابع: “إمام عاشور عامل الزمالك كوبري عشان بيراميدز يعلي الصفقة وياخد مرتب كبير وبحذر لآخر مرة الأخ سالم الشامسي وبعد كدا هشتكيه للشيخ محمد بن زايد”.
وأضاف: “تريد العودة وقع واحنا هنتفاوض مع ميتلاند الدنماركي سواء إعارة 6 أشهر أو سنة أو بيع ولكن لديهم معسكر وأنت متواجد به”.
وواصل: “مش عيل هيضحك عليا ومش هيدخل عليا الفيلم اللي بتعمله وبتلعب على مشاعر الجمهور انا من حواري روض الفرج، مؤمن زكريا عملها قبل كدا وكان بيبوس الشعار وراح الأهلي وكهربا كان بيبوس الشعار وراح الأهلي وعادي ممكن نلاقيك وراهم”.
وأردف: “مش عاوز اقول يا إمام عربيتك اتحرقت ليه وجيتلي منهار وبتعيط، لن نتذلل للاعب بجمهور الزمالك وحافظوا على كرامة النادي، الزمالك مفتوح لإمام عاشور ومصطفى فتحي وطارق حامد ومحمد أبوجبل وجنش وعمر كمال وأي لاعب ترك النادي ورحلّ ولكن النادي لا يجري خلف لاعب”.
واعتبر بعض جماهير الزمالك أن مرتضى منصور يحاول تطفيش اللاعب، واتهمه البعض بالعمل لصالح الأهلي.
وواصل مرتضى منصور موجها حديثه لجمهور الزمالك: “أنا بقى اللي عملتلك كرامة.. وأي عيل قليل الأدب هيعملي تريند تالت ولا رابع ولا خامس هحبسه ولما أمك تعيط هقولها ربي ابنك”.
