وجه أحمد حسام ميدو، نجم الزمالك السابق ومنتخب مصر الأسبق رسالة نارية إلى مصطفى شلبي، جناح الفريق الأول لكرة القدم بنادي الزمالك، ومحمد عبدالمنعم مدافع النادي الأهلي، وذلك بسبب احتفالهم المثير بالهدف.
وقال ميدو في تصريحات تلفزيونية: “مصطفى شلبي، إيه الداعي إن أنت تحط نفسك في جملة مفيدة وتخلي شكلك وحش قدام الناس كلها أنا أفهم إن في نجم كبير بيقدم للنادي حاجة كبيرة جدًا وبقاله سنين وكتب تاريخ أنه يصل لمرحلة يلعب بأتيتيود كانتونا وروي كوستا وتوتي، اللي هو أنا أعلى منكم كلكم”.
وأضاف: “أنت بتوجه رسالة لمين انتوا مين فهمكم أن مستواكم دلوقتي يخليكم تفتكروا إن أنا أكبر من أي حد وإن أنا أقدر أعمل أي حاجة،مين وصلكم الأفكار دي”.
وتابع: “مصطفى شلبي، أحرز هدف الزمالك الثالث، الماتش خلصان الزمالك حط نتيجته في جيبه، مصطفي، بعد ما أحرز الهدف راح للجمهور وشارر بالصمت وشاور بحركة تانية على صدره”.
وأكمل لاعب منتخب مصر الأسبق حديثه قائلا: “الزمالك لازم يراجع مصطفى شلبي، على الحركة إللي عملها بعد إحرازه الهدف الثالث في دريمز”.
وأردف: “أنا بحاول أفهم إيه اللي يخليك وأنت جايب جون في ماتش مهم ومفروض دي أسعد لحظات حياتك إنك تفتح الشورت وتبص جوه! إيه الحاجة اللي يتفكر فيها تخليك تفتح الشورت بعد ما تجيب جون! إيه اللي خلاك تفكر في كده”.
وأفاد: “أنا مش قادر أفهم، هل الجيل ده كان بياكل حاجة وهو صغير غير اللي جيلنا كان بياكلها، المياة فيها حاجة، أنا مش قادر افهم! بطنك ايه اللي كانت وجاعك، يعني هل في لعيب كان متعور في ركبته قبل كده بعد ما يجيب جون هيبوس ركبته؟”.
وواصل: “أنا لو بشتغل في ملف كرة القدم بالنادي الأهلي لازم أعرض محمد عبدالمنعم، على أخصائي نفسي، لأن لا يمكن لعيب بيفكر بطريقة عادية اللي هو عنده توازن في أفكاره يبقى ده رد فعله بعد ما يسجل هدف يفتح الشورت، لا يمكن يكون ده تفكير طبيعي أنا مشوفتهاش قبل كده”.
وزاد: “الأقبح من طريقة الاحتفال العذر اللي طلع بيه محمد عبدالمنعم، معرفش إيه الحالة النفسية إللي تخلي لعيب يعمل كده،أنا لا أطالب بعقابه ولا أحب الأذى لحد”.
واستطرد: “عبدالمنعم، مدافع كويس وله مستقبل وبيلعب في منتخب مصر عشان مفيش مدافعين في مصر، لأول مرة في التاريخ مصر تعاني من أزمة في الدفاع”.
واختتم حديثه قائلًا: “محمد عبدالمنعم، لاعب كويس لكن بكل صراحة وده باين في أسلوب لعبه وطريقة كلامه مع المنافسين شايف نفسه أوي عنده حتة (عظمة)”.
